भारतको विशेष अदालतले बम विष्फोट घटनामा संलग्न ३८ जनालाई फाँसीको सजाय र ११ जनालाई आजीवन कैदको सजाय सुनाइएको छ ।
१४ वर्ष अघि सन् २००८ मा भएको एक श्रृंखलाबद्ध बम विष्फोट घटनामा संलग्न ७७ जना आरोपी मध्य २८ जनाले भने सफाइ पाएका छन् । भारतीय समाचार माध्यमको अनुसार पहिलोपटक एकसाथ ४९ जनालाई आतंकवादको आरोपमा दोषी ठहर्याइएको हो ।
त्यस्तै भारतीय टेलिभिजन च्यानल आजतकले अहमदावादको विशेष अदालतका न्यायाधीश अम्बालाल पटेलले ६ हजार ७५२ पानाको फैसलामा ४९ आरोपीलाई दोषी ठहर गर्दै सजाय सुनाएको जनायो ।
१३ वर्षदेखि चलेको सुनुवाइको क्रममा प्रहरी र कानुन व्यवसायीहरुले १ हजार १६३ जनाको बयान सहित ६ हजार भन्दा बढी प्रमाण जुटाएका थिए ।
सन् २००८ को जुलाई २६ तारिखमा भएको बम विष्फोटमा ५६ जनाको मृत्यु भएको थियो भने २०० बढी घाइते भएका थिए ।
