उखु बिक्री गरेको रकम उद्योगले अझै नदिएपछि किसानहरु आन्दोलनका लागि काठमाडौं आएका छन् । सरकार र उद्योगीले प्रतिवद्धता जनाएअनुसार रकम नदिएपछि किसानहरु आज काठमाडौं आएका हुन् ।
एउटै विषय लिएर पाँचौ पटक उखु किसान काठमाडौं आएको हुन् । उखु किसान संघर्ष समिति सर्लाहीका अनुसार ६ वटा उखु मिलबाट किसानले ४१ करोड रुपैयाँ भुक्तानी पाउन बाँकी रहेको बताईएको छ । समितिका सचिव हरेश्याम राय यादवले सरकारलाई हाम्रो बक्यौता उठाइदेऊ भन्न चाहेको र सकेसम्म प्रधानमन्त्रीलाई नै भेटेर किसानको गुनासो राख्ने बताए ।
६ वटा मिलबाट ४१ करोड रुपैयाँ अझै भुक्तानी पाउन बाँकी रहेको रायले जानकारी दिए । किसानहरुले अन्नपूर्ण चिनी मिलबाट ९ करोड, श्रीराम सुगर मिलबाट ८ करोड, इन्दीरा चिनी मिलबाट २ करोड र लुम्बिनी चिनी मिलबाट तीन करोड रुपैयाँ बक्यौता उठाउन बाँकी रहेको छ । यस्तै सरकारले उखु किसानलाई अनुदान दिएको तर उद्योगले हिसाब मिलान नगरेको साढे ६ करोड हाराहारी रकम किसानले पाउन बाँकी रहेको उनीहरुले बताएका छन् ।
