काठमाडौं, असार २५
सन्ध्या तिवारीका नाममा दर्ता रहेको पुनर्गठित नेकपा एमालेको नाम परिवर्तन गरिएको छ ।
नेकपाभित्र विवाद चर्किरहेका बेला गत साल सन्ध्या तिवारीका नाममा निर्वाचन आयोगमा नेकपा एमाले दर्ता भएको थियो ।
सर्वोच्च अदालतले गत फागुन २३ गते नेकपालाई विभाजन गराई पुरानै एमाले ब्युँताइदिएपछि तिवारीको एमाले खारेज भएको हो ।
तिवारीको पार्टीको नाम अब जनता जनवादी पार्टी (जजपा) रहने भएको छ । निर्वाचन आयोगले तिवारीलाई पत्र लेखेर उनको पार्टीको नाम परिवर्तन गर्न निर्देशन दिएको थियो । चुनाव चिन्ह डामाथिको उदाउँदो सूर्य नै रहेको छ ।
