भरतपुर आँखा अस्पतालमा आएकी शिंखनकुमारी महतोको आँखा बिरामी भएको तीन वर्ष भयो । उनको दाहिने आँखाले नजिकको वस्तु मात्रै देख्छ, टाढाको वस्तु देख्न सक्दैन । जेठो छोरासँगै नवलपरासीबाट अस्पताल आएकी उनको आइतबार आँखाको अपरेसन रहेको छ । उनका छोरा धनबहादुर महतोले भने, ‘अस्पताल आएको चार दिन भइसक्यो । आमाको अपरेसनको लागि १४ हजार रुपैयाँ तिरिसकेको छ । अपरेसनपछि आमाले राम्रोसँग आँखा देख्नु हुनेछ भन्ने आश छ ।’ धेरै भीडभाडको कारण लाइन धेरै बस्नुपरेको महतोले बताए ।
यस्तै गोन्द्राङकी लक्ष्मी थापा मगरको पनि आँखा धमिलो, आशु आइराख्ने भएकोले भरतपुर आँखा अस्पताल जचाउँन आएकी हुन् । नातिसँग बिहान १० बजेदेखि अस्पताल आएकी थापामगरलाई रिपोर्ट लिनको लागि दिउँसो २ बजेपछि बोलाएको उनले बताइन् ।
यसैगरी खैरहनी नगरपालिकाका दुई दम्पतीहरु पनि आखाँको उपचारका लागि अस्पताल आएका छन् । उनीहरुको दुवै आँखाको अपरेसन गरेको दुई वर्ष पूरा भयो । आँखामा चिप्रा, आशु आउने भएकोले उनीहरुले आँखाको अपरेसन गरेका हुन् । आँखा अपरेसनपछि पनि उनीहरुको आँखामा समस्या आएर अस्पताल आएको बताएका छन् । आँखामा आशु आउने भएकोले उनीहरु अस्पताल आएका बताउँछन् ।
यस्तै भरतपुरको दिव्यनगरकी तीजा गुरुङको पनि गत पुस १० गते आँखाको अपरेसन गरिएको हो । टाढाको वस्तु नदेख्ने र नजिकको वस्तु मात्रै देख्ने भएकोले उनले आँखाको अपरेसन गरेको बताइन् । अस्पतालबाट दिइएको कालो चस्मा लगाएर आएकी तिजाले अपरेसनपछि टाढाको मान्छेहरुलाई थम्माउन सक्छिन् । उनको आँखामा फेरी समस्या आएकोले उनी अस्पताल आएकी हुन् ।
चितवनमा आँखा बिरामीहरुको संख्या बढ्दो क्रममा रहेको छ । भरतपुर आँखा अस्पतालमा ओपीडीमा एक दिन हजार जनाले आँखा उपचार गर्न आएका छन् । गतवर्षसम्म यो संख्या ६०० को हाराहारीमा हुन्थ्यो । भरतपुर आँखा अस्पतालका सूचना अधिकारी रमेश घिमिरेले दिएको जानकारी अनुसार चितवनमा पहिलो पटक एकैदिन यसरी आँखा बिरामी बढेको हो । कोरोनापछि चितवनलगायत विभिन्न जिल्लामा आँखा बिरामी बढेको उनले बताएका छन् । लकडाउनको समयमा धेरै मानिसहरु अस्पताल आउन डराएकोले पनि अहिले परीक्षण गर्न आउनेको संख्या बढ्न गएको अस्पतालले जानकारी दिएको छ । जाडो महिनामा भन्दा गर्मी महिनामा आँखाका बिरामीहरु बढ्ने प्रवक्ता घिमिरेले बताए । हाल नेपालमा वन जंगलमा भएको डढेलोको कारणले प्रदुषण बढेको कारण आँखामा धेरै समस्या आएको घिमिरेले बताए । प्रदुषणले गर्दा आँखा पोल्ने, चिलाउने, दुख्ने जस्ता समस्याहरु देखा पर्ने उनको भनाइ छ ।
अस्पतालमा इमरजेन्सी सेवा भने नागरिकले पाउन सकेका छैनन् । भरतपुर महानगरपालिका–११ बसेनीका बिराज गुरुङले छोराको आँखामा साथीले हिर्काइदिएर अचानक राति आँखा अस्पतालको इमरजेन्सीमा लिएर गए तर अस्पतालको सुरक्षा गार्डले इमरजेन्सी सेवा चल्दैन भनेर गेटबाटै फर्काइदियो । उनले अस्पतालमा बिमा शुल्क बापत जम्मा १००० मात्र काट्ने गरी चर्काे मूल्यमा चस्मा बिक्री गर्दा गरिब नागरिकहरु मर्कामा पर्ने गरेको नारायणी अनलाइनलाई बताए । उनले भने, ‘बिमाअनुसार चश्मा लिन पाउने नै हो भने पूरै छुट गर्न नसक्नु अस्पतालको प्रशासनिक कमजोरी हो ।’ बिरामीको चाप बढेसँगै उपचारको गुणस्तरिता पनि खस्कँदै गएको सर्वसाधारणले गुनासो गरेका छन् ।
