Breaking News
चितवनमा सुरेन्द्र पाण्डेमाथिको दुर्व्यवहारले नेकपामा तरंग, नेता खनालले गरे कारबाहीको माग
काठमाडौं, मंसिर ६-
सत्तारुढ दल नेपाल कम्युनिस्ट पार्टी (नेकपा)का वरिष्ठ नेता झलनाथ खनालले चितवनमा नेता सुरेन्द्र पाण्डे सुनियोजित रुपमा दुर्व्यवहार गरिएको बताएका छन्।
सुनियोजित रुपमा अभद्र व्यवहार तथा नाराबाजी भएको भन्दै वरिष्ठ नेता खनालले सम्लग्न व्यक्तिलाई कडाभन्दा कडा कारवाहीको माग गरेका छन्।
शनिबार साँझ एक विज्ञप्ति प्रकाशित गर्दै वरिष्ठ नेता खनालले नेता पाण्डेमाथि भएको दुर्व्यवहारको निन्दा एवं भत्र्सना गर्दै सम्लग्न व्यक्तिलाई कडाभन्दा कडा कारवाहीको माग गरेका हुन्।
‘कार्यक्रममा आफ्ना भनाइहरु राखिरहेको अवस्थामा अनाधिकृत रूपमा प्रवेश गरेका केही अराजक व्यक्तिहरूले गरेको अभद्र व्यवहार तथा नाराबाजी अत्यन्तै निन्दनीय छ। यस्तो गैह्र जिम्मेवारपूर्ण घटनाको घोर निन्दा तथा भर्त्सना गर्दछु’, खनालद्वारा जारी विज्ञप्तिमा भनिएको छ, ‘कम्युनिस्ट पार्टीको नैतिक मूल्य, आचरण तथा आदर्शविपरीत यस्तो आपत्तिजनक कार्यमा संलग्न व्यक्तिलाई तत्काल कडाभन्दा कडा कारबाही गर्न सम्बन्धित पार्टी कमिटीको ध्यानाकर्षणसमेत गराउँछु।’
पूर्वप्रधानमन्त्री समेत रहेका नेता खनालले पार्टीको आन्तरिक विवाद उत्कर्षमा पुगेको र त्यसको समधानका लागि उपायहरु खोजी भइरहेका बेला यस्ता घटनाले स्थितिलाई झनै उत्तेजक बनाउने भन्दै सचेत रहन नेता कार्यकर्तालाई आग्रह समेत गरेका छन्।
नेकपा स्थायी कमिटी सदस्य पाण्डेले शनिबार चितवनको राप्ती नगर पार्टीको बैठकमा बोलिरहँदा केही नेताहरुले नाराबाजी गरेका थिए ।केपी ओली समूहका युवा तथा विद्यार्थीहरुले पाण्डे सहभागी कार्यक्रममा नाराबाजी गर्दा कार्यक्रम नै बिथोलिएको थियो ।
पूर्व अर्थमन्त्री समेत रहेका नेता पाण्डे सोही क्षेत्रको सांसद समेतहुन् । उनी विकास निर्माण आयोजनाको अनुगमन गर्न र पार्टीका विभिन्न कार्यक्रममा सहभागी जनाउन शुक्रबार चितवन पुगेका थिए।