माडी नगरपालिका–६ लक्ष्मीबासको पुष्पमदन बाटिकामा पाँच तले भ्यु टावरसहितको होटल बन्ने भएको छ ।
दुई करोड लागतमा पुष्पमदन बाटिकाभित्र बन्ने पार्कको डीपीआर तयार भएको माडी नगरपालिकाका नगरप्रमुख ठाकुर ढकालले नारायणी अनलाइनलाई जानकारी दिनुभयो । स्वर्गीय नेताहरु पुष्पलाल श्रेष्ठ र मदन भण्डारीको स्मरणमा निर्माण गरिएको बाटिकामा होटलसहितको भ्यू टावर, बालउद्यान, एकतास्तभ्भ, पुष्पलाल र भण्डारीको शालिक, वनभोज स्थल र सभाहल रहने उहाँले बताउनु भयो । टावरबाट माडी नगरपालिकाका महत्वपूर्ण दृश्यसहित भरतपुरको गोलालघाटसम्मका दृश्यहरु हेर्न सकिने गरी डीपीआर तयार गरिएको छ ।
पुष्पमदन बाटिका सञ्चालन समितिका उपाध्यक्ष श्री दवाडीका अनुसार भ्युटावरलाई स्थानीय समुदायले सञ्चालन गर्ने तयारी गरेको छ । कम्युनिटी जंगल लज नाम दिइएको सो टावर पाँच तलाको हुनेछ टावरको माथिल्लो तलामा दूरबिन राखिएको हुनेछ भने प्रत्येक तलामा पर्यटकहरुले दृश्य अवलोकन गर्दै खाना खान सक्नेछन् । उपाध्यक्ष दवाडीले दुई करोड लागतमा बन्ने टावर अबको पाँच वर्ष भित्रमा सञ्चालनमा ल्याउने योजना रहेको नारायणी अनलाइनलाई बताउनुभयो । उहाँले अहिले समिति सभाहल निर्माणको काममा लागिरहेको बताउनुभयो । पुष्पमदन बाटिकालाई व्यवस्थित र पर्यटकीय आकर्षणको केन्द्र बनाउन गत वर्ष प्रदेश सरकारले एक करोड बजेट बिनियोजन गरेको थियो भने यस वर्ष प्रदेश सरकारले ४० लाख रुपैयाँ र संघीय सरकारले १० लाख रुपैयाँ बिनियोजन गरेको छ ।
