नेपाल आदिवासी जनजाति महासंघ अन्तर्राष्ट्रिय समन्वय समिति (नेफिन आइसीसी)ले सेनाको कुटाइबाट ज्यान गुमाएका पूर्वीचितवन राप्ती नगरपालिकाका २४ वर्षीय राजकुमार चेपाङको परिवारलाई एक लाख रुपैयाँ आर्थिक सहयोग गरेको छ ।
आज (शुक्रबार) एक कार्यक्रमकाबीच राप्ती नगरपालिकाका उपप्रमुख इमानसिंह लामा, नेपाल आदिवासी जनजाति महासंघ चितवनका अध्यक्ष सुरवीर थापामगर, नेपाल चेपाङ संघ चितवनका सचिव इन्द्र चेपाङलगायतको उपस्थितिमा सो सहयोग रकम हस्तान्तरण गरिएको हो । नेपाल आदिवासी जनजाति पत्रकार महासंघ (फोनिज) को समन्वयमा केन्द्रीय सदस्य राजु चौधरीको व्यवस्थापनमा सो रकम हस्तान्तरण गरिएको हो ।
सो क्रममा बोल्दै उपप्रमुख लामाले चेपाङ परिवारको दुःखमा नेफिन आइसीसीले गरेको सहयोगप्रति धन्यवाद ज्ञापन गरे । उनले आफ्नो व्यक्तिगत तर्फबाट राजकुमारको घर निर्माण गरिदिएको भन्दै आफ्नोतर्फबाट सक्दो सहयोग रहेको बताए । उनले नगरपालिकाको तर्फबाट दिने भनिएको तीन लाख रुपैयाँ पनि आइतबार प्रदान गरिने जानकारी दिए । चितवन राष्ट्रिय निकुञ्ज प्रशासनले दिने भनिएको रकमका लागि पनि पहल भइरहेको उपप्रमुख लामाले बताए ।
चेपाङ परिवारमा परेको दुःखमा नेफिन आइसीसीले रकम संकलन गरी सहयोग गरेको नेफिन आइसीसीका संयोजक किसन राईले जानकारी दिएका छन् ।
गत साउन १ गते चितवन राष्ट्रिय निकुञ्जका सेनाको कुटपिटबाट गम्भीर घाइते भएका २४ वर्षीय चेपाङको साउन ८ गते उपचारकै क्रममा भरतपुर अस्पतालमा मृत्यु भएको थियो । उनको एक सातापछि मात्रै शव उठेको थियो ।
पीडित परिवार र प्रशासनबीच भएको छलफलले १० लाख क्षतिपूर्ति दिने सहमति भएको थियो । जसमा तीन लाख स्थानीय सरकारको तर्फबाट राप्ती नगरपालिका र चितवन राष्ट्रिय निकुञ्जले ७ लाख दिने सहमति भएको थियो । नगरपालिकाले आइतबार सो रकम प्रदान गर्दैछ भने निकुञ्जले एक लाख बाहेक अन्य रकम दिएको छैन ।
