चितवन, भदौं १८–

चितवनमा पछिल्ला दिन कोरोना भाइरस (कोभिड–१९) संक्रमितको संख्या बढ्दै गइरहेको छ ।

बुधबार रातीसम्ममा चितवनमा कोरोना संक्रमितको संख्या ८४७ पुगेको छ । संक्रमितको संख्या अझै बढ्ने क्रममा छ । जिल्लामा सबैभन्दा बढी संक्रमित भरतपुर महानगरपालिकामा रहेका छन् । यहाँ बुधबार राति सम्ममा संक्रमितको संख्या ५२५ जना पुगेका छन् ।

(तथ्यांकः भदौं १८ गते बिहीबार विहान ८ बजेसम्मको)

जिल्लामा दोस्रो धेरै संक्रमितको सूचीमा रत्ननगर नगरपालिका रहेको छ । रत्ननगर–४ देबौलीमा रहेको शिवशक्ति खाद्य उद्योगका ५० बढी कर्मचारीलाई संक्रमण पुष्टि भएको छ । ती सबै संक्रमित अहिले उद्योेग भित्रकै आइसोलेसन कक्षमा रहेका छन् । एकै ठाउँमा यति धेरै संक्रमित भेटिएको चितवनमा यो पहिलोपटक हो । अहिले यस नगरपालिकामा संक्रमितको संख्या ११२ जना रहेका छन् ।

यस्तै राप्ती नगरपालिका तेस्रो स्थानमा रहेको छ । यहाँ रहेको सशस्त्र प्रहरीको गणमा कार्यरत ५० बढी प्रहरीमा एकैपटक संक्रमण पुष्टि भएको थियो । चितवनमा पहिलोपटक कोरोना संक्रमण पुष्टि हुने दुई जना पनि यही नगरपालिकाका बासिन्दा हुन् । वैशाखमा पहिलोपटक चितवनमा दुई जनामा संक्रमण पुष्टि भएको थियो । हालसम्म राप्तीमा संक्रमितको संख्या ८८ पुगेको छ ।

यस्तै चौथो स्थानमा माडी नगरपालिका रहेको छ । यहाँ हाल भने ११ जना मात्रै संक्रिय संक्रमित छन् । ५२ जना संक्रमण पुष्टि भएकोमा ४१ जना यसअघि नै निको भएर घर फर्किएका छन् ।

त्यस्तै पाँचौं स्थानमा खैरहनी नगरपालिका रहेको छ । यहाँ हालसम्म संक्रमितको संख्या ५० पुगेको छ । यस नगरमा पनि पछिल्लो समय संक्रमितको संख्या बढ्दै गइरहेको छ ।

छैटौं स्थानमा कालिका नगरपालिका रहेको छ । यहाँ संक्रमितको संख्या १६ पुगेको छ । अन्तिम स्थानमा जिल्लाको एक मात्र गाउँपालिका इच्छाकामना रहेको छ । असार महिनासम्ममा इच्छाकामनामा एक जनामा पनि कोरोना संक्रमण फेला परेको छैन । साउन यता मात्रै तीन जना संक्रमित इच्छाकामनाका फेला परेका हुन् ।

मृतकको संख्या १० पुग्यो

चितवनमा विस्तारै कोरोनाबाट हुने मृत्युदर पनि बढ्दै गइरहेको छ । असार महिनासम्म जिल्लाका एक जनाको मात्रै कोरोनाबाट निधन भएको थियो । तर पछिल्लो डेढ महिनामै मृतकको संख्या १० पुगेको छ । जिल्लामा सबैभन्दा धेरै कोरोनाबाट ज्यान गुमाउनेमा भरतपुर महानगरपालिकाका रहेका छन् ।

भरतपुरका ७ जना, खैरहनी नगरपालिकाका २ जना र रत्ननगर नगरपालिकाका एक जनाको कोरोनाबाटै मृत्यु भएको हो । खैरहनीका एक जनाको भने घरमै मृत्यु भएको हो । ती १०८ वर्षीया वृद्धाको मृत्यु पश्चात कोरोना पुष्टि भएको थियो । यस्तै अर्की ५५ वर्षीया महिलाको पनि भरतपुर अस्पतालमा उपचारको क्रममा मृत्यु भएपछि मृत्यु पश्चात मात्रै कोरोना संक्रमण पुष्टि भएको थियो ।