नेपाल चेपाङ संघ केन्द्रीय समितिले चेपाङ युवक कुट्ने सैनिक जवानलाई कारवाही गर्न माग गर्दै आन्दोलनको चेतावनी दिएको छ ।
आज (शुक्रबार) भरतपुरमा पत्रकार सम्मेलन गर्दै संघले राप्ती नगरपालिका–२ का २४ वर्षीय राजकुमार चेपाङलाई कुटपिट गर्ने सैनिक जवानलाई तत्काल सार्वजनिक गरी कारवाही गर्न माग गरेको हो । संघले मृतक राजकुमार चेपाङको परिवारलाई राहत स्वरुप १० लाख रुपैयाँसहित उचित क्षतिपूर्तिको व्यवस्था हुनुपर्ने, घटनामा घाइते भएका अन्य चार जनाको उचित निःशुल्क उपचार गर्नुपर्ने माग राखेका छन् ।
नेपाल चेपाङ संघ, बागमती प्रदेश अध्यक्ष खुशीलाल चेपाङले संघको निर्णय सुनाउँदै पहिलो प्राथमिकता दोषी सैनिक जवानलाई कडा कारवाही हुनुपर्ने बताए । उनले भने–‘पहिलो त सैनिकलाई कारवाही हुनुपर्यो, मृतक परिवारलाई १० लाख क्षतिपुर्ति दिनुपर्यो, अन्य घाइतेलाई निःशुल्क उपचार हुनुपर्यो ।’
राप्ती नगरपालिका–२ का राजकुमार चेपाङको सेनाको कुटाईबाट साउन ८ गते मृत्यु भएको थियो । उनको शव अहिले पनि त्रिवि शिक्षण अस्पतालमा रहेको छ । शव पोष्टमार्टम भए पनि माग सम्बोधन नभएकाले परिवारले शव बुझ्न मानेको छैन । पत्रकार सम्मेलनमा बोल्दै संघका निवर्तमान अध्यक्ष एवंम संविधानसभा सदस्य गोविन्दराम चेपाङले आइतबारसम्ममा माग सम्बोधन नभए चरणद्ध आन्दोलनमा उत्रिने चेतावनी समेत दिएका छन् ।
पत्रकार सम्मेलनमा सेनाको कुटाईबाट घाइते भएकाहरुले आफूहरुको निःशुल्क उपचार र उचित क्षतिपूर्ति दिन माग समेत गरेका छन् । यस्तै संघले माडी–९ कुसुमखोलाका पीडित परिवारलाई गाँसबास कपाससहितको तत्काल पुर्नवास मिलाउन माग गरेको छ ।
चेपाङ समुदायको घर आगजनी, भत्काउने, अन्नबाली नष्ट गर्ने र गराउन निर्देशन गर्ने कर्मचारीमाथि तत्काल छानविन गरी बर्खास्तसहितको कानुनी कारवाही गर्न माग गरिएको संघकी वरिष्ठ उपाध्यक्ष सुनिमाया चेपाङले बताइन् । चितवन राष्ट्रिय निकुञ्जले साउन ३ गते कुसुमखोलामा रहेका चेपाङको दुई घरमा आगजनी गरेको थियो भने केही छाप्रो भत्काएको थियो ।
