सरकारले साउन ६ गते मध्यरातदेखि लकडाउन अन्त्य भएको घोषणा गरेपनि कोरोना संक्रमणको दर घटेको छैन ।
लकडाउन खुलेसँगै राजधानीका अधिकांश क्षेत्रमा भिडभाड देखिन्छ । सामाजिक दुरी कायम गरिएको पाईदैन । यात्रुबाहक सवारी साधनमा समेत मानिसहरु बाक्लिएका छन्।
लकडाउन खुला गरिएसँगै काठमाडौं उपत्यका कोरोना भाइरस महामारीको उच्च जोखिममा छ । अर्कोतर्फ सरकारले परीक्षणको दायरा पनि खुम्च्याएको छ।
सवारी साधन सञ्चालनमा लागू भएको जोर विजोर प्रणाली पनि हटेको छ । त्यसैले काठमाडौं उपत्यकाका मुख्य सडकहरुमा सवारी चाप बढेको छ ।
सरकारले असार २६ गतेदेखि उपत्यकाको हकमा तीन जिल्लाभित्र र बाहिरको हकमा जिल्लाभित्र सवारी साधन चल्ने निर्णय गरेको थियो । त्यसअघि नै निजी सवारी साधन खुला गरिएका थिए। भदौ १ गतेदेखि लामो दुरीका सवारी साधन चल्ने निर्णय भइसकेको छ। लकडाउनका कारण गाउँ गएकाहरु निरन्तर काठमाडौं फर्किरहेका छन्।
उपत्यका फर्कँदा स्वास्थ्य परिक्षणको रिपोर्ट र आफू बस्न स्थानीय निकायको अनुमति चाहिनुपर्ने व्यवस्था गरिएपनि यसको कार्यान्वयन पक्ष फितलो रहेको अधिकारीहरु बताउँछन्।
