मंगलबार दिउँसो भरतपुर अस्पतालको आधिकारिक फेसबुक पेजमा एउटा प्रेस विज्ञप्ती जारी गरियो । विज्ञप्तीमा भरतपुर अस्पताल, भरतपुर कोभिड–१९ ल्याब र कोरोना अस्पतालले दिएको सेवाको बारेमा उल्लेख छ । सोही विज्ञप्तीको बीचमा लेखिएको थियो–‘हालसम्म कोरोना विशेष (अस्थायी) अस्पतालबाट शनिबार र आइतबार गरी १८ जना पोजिटिभ बिरामीहरुलाई भरतपुर अस्पतालमा स्थानान्तरण गरी उक्त कोरोना विशेष (अस्थायी) अस्पताल बन्द गरिएको छ । सुरक्षाको दृष्टिकोणले उक्त अस्पताललाई पूर्ण रुपमा निर्मलीकरण गरिने छ ।’
यही कुरालाई उल्लेख गर्दै नारायणी अनलाईनले भरतपुर कोरोना अस्पताल बन्द भएको समाचार प्रकाशित गर्यो । अन्य विभिन्न संचारमाध्यमले समेत प्राथमिकता साथ सो समाचार प्रकाशन गरे । अस्पताल बन्द भएको समाचार प्रकाशित भएपछि भरतपुर अस्पताललाई चर्को दवाब आएको स्रोतले जनाएको छ । अन्ततः मंगलबार राती ९ बजे नै अस्पतालले पुनः अर्को विज्ञप्ती जारी गर्दै बन्द भएको ठाउँमा स्थगन गरिएको उल्लेख गरेको छ । अस्पतालका प्रमुख मेडिकल सुपरिटेण्डेन्ट डा.श्रीराम तिवारीद्धारा जारी विज्ञप्तीमा कोरोना अस्पतालको मर्मत सम्भारका लागि हाललाई सेवा स्थगित गरिएको उल्लेख छ ।
केहीदिन अघि सोही अस्पतालमा रहेका कोरोना संक्रमितहरुले आइसोलेसन कक्षमै शौचालयको पानी बगेको भिडियो सार्वजनिक गरेपछि अस्पताल फेरि विवादमा तानिएको थियो । संक्रमितहरुले आफूहरुको गुनासो कोरोना अस्पतालले नसुनेको, गुणस्तरी खानाको व्यवस्था नगरे जस्ता आरोप लगाएका थिए । अस्पतालमै शौचालयको पानी बगेको खबर सार्वजनिक भएपछि त्यहाँ रहेका सबैलाई भरतपुर अस्पताल सारिएको थियो ।
भरतपुर महानगरपालिकाको अग्रसरतामा खोलिएको सो अस्पताल वैशाखदेखि भरतपुर अस्पतालको व्यवस्थापनमा संचालन भइरहेको थियो । कोरोना अस्पतालबाट ९५३ जना शंकास्पद बिरामीको मात्र स्वाब संकलन गरी आरटी पीसीआर विधिबाट कोरोना परीक्षणका लागि विभिन्न प्रयोगशाला पठाईएको थियो । यस्तै सो अस्पतालमा २८ जना कोरोना भाइर संक्रमितको व्यवस्थापन गरिएको थियो ।
गत चैतदेखि भरतपुर–१० स्थित चितवन प्रदर्शनी केन्द्रमा संचालनमा आएको सो अस्पताल सुरुदेखि नै विवादमा तानिदै आइरहेको थियो । पछिल्लो समय अस्पतालमा रहेका स्वास्थ्य उपकरणसंगै अन्य सामग्रीहरु अस्पतालकै कर्मचारीहरुले चोरी गरेको सीसीटिभी फुटेज बाहिरिएको थियो । यसले देशभर नै तरंग छाएको थियो । सोही घटनालाई लिएर व्यापक अनियमितता भएको आशंकामा अख्तियार दुरुपयोग अनुसन्धान आयोगक हेटौंडाले छापा मारेर अनुसन्धान समेत गरिरहेको छ ।
अस्पताल संचालनका लागि करोड बढी खर्च भएको विवरण सार्वजनिक भएको थियो २५ लाखको शौचालय मात्रै निर्माण गरिएको विवरण बाहिरिएको थियो ।
