चितवनमा आज (बुधबार) गरिएको कोरोना परीक्षणमा १३१ जनाकै रिपोर्ट नेगेटिभ आएको छ ।
भरतपुर कोभिड–१९ परीक्षण प्रयोगशालामा बुधबार गरिएको परीक्षणमा सबैको रिपोर्ट नेगेटिभ आएको भरतपुर अस्पतालले जनाएको छ । चितवनका भरतपुर अस्पतालबाट ४६, वीपी कोइराला मेमोरियल क्यान्सर अस्पताल भरतपुरबाट २६, भरतपुर महानगरपालिकाबाट ८, चितवन मेडिकल कलेजबाट ११, सेन्ट्रल हस्पिटलबाट ३, नारायणी सामुदायिक अस्पतालबाट ८, खैरहनी नगरपालिकाबाट ३६ र मनकामना अस्पतालबाट ५ जनाको नमुना स्वाब परीक्षण गरिएको थियो ।
आज परीक्षण गराएकाहरु मध्येमा चिकित्सक र स्वास्थ्यकर्मीहरु समेत छन् । नेगेटिभ रिपोर्ट आएसंगै अब अस्पतालहरुमा देखिएको त्रास कम भएको छ । सोमबार एकैदिन तीन जना स्वास्थ्यकर्मीमा कोरोना पोजिटिभ देखिएको थियो । यससंगै स्वास्थयकर्मीहरुमा त्रास फैलिएको थियो ।
चितवनमा हालसम्म २७ जना कोरोना संक्रमित रहेका छन् । जसमध्ये दुई जना निको भएर डिस्चार्ज भएका छन् भने एक जनाको निधन भएको छ ।
यस्तै बुधबार नै गरिएको परीक्षणमा सल्यानका १३१ जनाको कोरोना रिपोर्ट पनि नेगेटिभ आएको छ ।
