राष्ट्रियसभामा आज (बुधबार) नवनिर्वाचित १८ सदस्यले पद तथा गोपनीयताको शपथ लिँदै छन् ।
राष्ट्रियसभा अध्यक्ष गणेशप्रसाद तिमिल्सिनाले उनीहरूलाई शपथ गराउने कार्यक्रम रहेको संसद् सचिवालयले जनाएको छ ।
गत माघ २४ गते गरिएको राष्ट्रियसभा सदस्य निर्वाचनबाट निर्वाचित १८ सदस्यले आज बिहान ११ बजे संघीय संसद् भवनको ल्होत्से हलमा शपथ लिने भएका हुन् ।
राष्ट्रियसभाका १९ सदस्यको कार्यकाल यही फागुन २० अर्थात् हिजो मंगलबारबाट सकिएको छ । त्यही रिक्त स्थानमा पद पूर्तिका लागि माघ २४ गते निर्वाचन गरिएको थियो ।
पहिलोपटक निर्वाचन भएपछि सदस्यहरूको कार्यकाल गोलाप्रथाबाट निर्धारण गरिएको थियो । जसमा पहिलो दुई वर्षको कार्यकाल रहेका १९ जनाको औपचारिक रूपमा राष्ट्रिय सभाबाट बिदाइ भएको हो ।
निर्वाचन भएका १८ स्थानमध्ये १६ सिट सत्तारूढ नेपाल कम्युनिस्ट पार्टी (नेकपा)ले जितेको छ । राष्ट्रिय जनता पार्टीले दुई सिट जित्दा अन्य दलले कुनै पनि स्थानमा विजय हासिल गर्न सकेनन् ।
१९ सदस्यमध्ये १ जना भने राष्ट्रपतिबाट मनोनीत गर्ने व्यवस्था छ ।
जसमा नेकपाका उपाध्यक्ष वामदेव गौतमलाई लाने निर्णय नेकपा सचिवालय बैठकले गरिसकेको छ ।
तर यसमा प्रधानमन्त्रीसमेत रहेका पार्टीका एक अध्यक्ष केपी शर्मा ओलीले भने असहमति जनाइरहेका थिए ।
कार्यकाल सकिएका १९ सदस्य
कार्यकाल सकिएका सदस्यहरुमा युटोल तामाङ, रमेशप्रसाद यादव, राजकुमार कुँवर, रामपृत पासवान, विन्दादेवी आले राना, वृषेशचन्द्र लाल, कमलाकुमारी ओली, कालीबहादुर मल्ल, खेमराज नेपाली, धनकुमारी खतिवडा, बद्रीप्रसाद पाण्डे, बलरामप्रसाद बाँस्कोटा, मीना बुढा, मुक्ताकुमारी यादव, डा. युवराज खतिवडा, सरिता प्रसाईं, सुरेन्द्रराज पाण्डे र हरिचरण शिवाकोटी रहेका छन् ।
