झण्डै पाँच महिनापछि चितवन मेडिकल कलेज (सीएमसी)को शिक्षण विभागमा लगाएको ताला खुलेको छ । आज (मंगलबार) ताला लगाउने विद्यार्थीहरुले नै स्वंम खोलेका हुन् । विद्यार्थीहरुले कलेजलाई ‘आर्थिक नाकाबन्दी’ लगाउँदै शैक्षिक गतिविधि सुरु गर्न तालबन्दी खोलेको जनाएका छन् ।
पढाइ तत्कालै सुरु हुनुपर्ने तर आफ्ना सर्तहरु कलेज प्रशासनले पूरा नगर्दासम्म कुनै पनि शुल्क नतिर्ने घोषणासहित विद्यार्थीले ताला खोलेका हुन्। सीएमसीमा गत भदौदेखि तालाबन्दी थियो । विद्यार्थीहरु निरन्तर नारा जुलुस गर्दै धर्नामा बस्दै आएका थिए ।
‘केही सर्तसहितका निर्णयहरु गरी फरक किसिमको संघर्षमा जाने तर संघर्ष जारी राख्ने निर्णय भएको हो। सर्त पूरा नभए विद्यार्थी र अभिभावकहरु झन कडा संघर्षमा जानेछन्’ चिकित्सा शिक्षा संघर्ष समिति तथा चितवन मेडिकल कलेजका विद्यार्थीका तर्फबाट प्रकाश चन्द, काठमाडौं विश्वविद्यालय परिवारका तर्फबाट नरेश भट्ट र सिएमसीको अभिभावक संघर्ष समितिका निर्मला कँडेलले संयुक्त रुपमा जारी गरेको प्रेस विज्ञप्तीमा उल्लेख छ।
