एमबीबीएस र बीएनएसमा अध्ययनरत नियमित विद्यार्थीहरुले बिहीबार भएको बोर्डको वार्षिक परीक्षा बहिष्कार गरेका हुन् ।
एमबीबीएस तर्फ १२० जना र बीएनएस तर्फका ३८ जना विद्यार्थीहरुले बिहीबार परीक्षामा अनुपस्थित भएको मेडिकल कलेजले जनाएको छ । यस्तै मेडिकल कलेजका अनुसार एमबीबीएस र बीएनएसतर्फका पुरक परीक्षामा भने विद्यार्थी सहभागि भएका छन् । यसैबीच, आन्दोलनरत विद्यार्थीहरुले परीक्षास्थलमा अवरोध गर्न थालेपछि प्रहरीसँग सामान्य झडप भएको छ ।
कलेज प्रशासनमा लगाइएको ताला फोडिएको भन्दै विद्यार्थीहरुले अवरोध गरेपछि प्रहरीले लाठ्ठी चार्ज गरेको थियो । सो क्रममा केही विद्यार्थी र केही प्रहरी जवान सामान्य घाइते भएका छन् । सरकार र मेडिकल कलेज सञ्चालकबीच दुई बुँदे सहमति भए पनि विद्यार्थीहरुले आन्दोलनलाई जारी राखेका छन् ।
