म्याग्दीको मंगला गाउँपालिका–१ कुहुँस्थित दीपशिखा माध्यमिक विद्यालयलाई स्थानीय एक दम्पतीले दिवंगत अभिभावकको स्मृतिमा रु। १५ लाख बढी सहयोग गर्नुभएको छ ।
कुहुँको तुसारेपानी घर भई हाल अष्ट्रेलियामा रहनुभएका मुक्ति रोका र टिका रोका दम्पतीले स्वर्गीय बुबा गणेशबहादुर र आमा पोविसरा रोकाको स्मृतिमा उक्त सहयोग गर्नुभएको हो ।
विद्यालयका प्रधानाध्यापक डा। नन्दबहादुर खत्रीले बिहिबारदेखि सञ्चालन हुने शैक्षिक एवं धार्मिक महोत्सव तथा श्रीमद्भागवत धनधान्याञ्चल सप्ताह ज्ञान महायज्ञकी लागि रोका दम्पतीले रु। १५ लाख पाँच हजार ५५५ सहयोग गर्नुभएको जानकारी दिनुभयो ।
रोका दम्पतीले यसअघि पनि विद्यालयमा रु। १० लाखको अक्षयकोष स्थापना गर्नुभएको थियो । उक्त कोषबाट हरेक वर्ष विद्यार्थीलाई खेलकुद तथा अन्य शैक्षिक गतिविधिमा प्रोत्साहन गर्ने कार्यक्रम सञ्चालन हुँदै आएको छ ।
तत्कालीन समयमा मुक्ति रोकाकी आमा पोविसराको दुर्घटनामा निधन भएपछि उहाँका बुबा तथा तत्कालीन कुहुँ गाविसका सचिव गणेशबहादुर रोकाले विसं २०६३ मा विद्यालयमा अध्ययनरत विद्यार्थीलाई शैक्षिक पुरस्कार प्रदान गर्ने उद्देश्यले अक्षयकोष स्थापना गर्नुभएको थियो । कोरोना सङ्क्रमणका कारण गणेशबहादुरको निधन भएपछि उहाँहरूको योगदानको सम्मान गर्दै कोषको नाम गणेशबहादुर र पोविसरा रोका स्मृति अक्षयकोष राखिएको थियो ।
यसैबीच, विद्यालयमा बिहीबारदेखि सुरु हुने महायज्ञको तयारी पूरा भएको सहायक प्रधानाध्यापक हरिकृष्ण भट्टराईले जानकारी दिनुभयो । मङ्सिर ३ गतेसम्म विद्यालय परिसरमा सञ्चालन हुने महायज्ञमा बुधबारसम्म करिब रु। ४० लाख सहयोग प्रतिबद्धता प्राप्त भएको छ ।
महायज्ञमा विद्यालयका पूर्वप्रधानाध्यापक भद्रबहादुर क्षेत्रीले रु। पाँच लाख पाँच हजार ५५५, पूर्वविद्यार्थी महेन्द्र घर्तीले रु। तीन लाख ५० हजार र पूर्वसांसद नरबहादुर पुनले रु। तीन लाख सहयोग गर्ने प्रतिबद्धता जनाउनुभएको छ ।
विद्यालयले विपन्न, भौगोलिक रूपमा विकट तथा अपायक स्थानका विद्यार्थीलाई आवासीय सुविधा उपलब्ध गराई अतिरिक्त कक्षा सञ्चालन गर्ने र सिकाइ उपलब्धि वृद्धि गर्ने उद्देश्यले महायज्ञ आयोजना गरेको हो । महायज्ञबाट रु। तीन करोड सङ्कलन गरी रु। दुई करोडभन्दा बढी बचत गर्ने लक्ष्य राखिएको सहायक प्रधानाध्यापक भट्टराईले बताउनुभयो ।
महायज्ञमा पण्डित दीनबन्धु पोखरेलले श्रीमद्भागवत कथा वाचन गर्नुहुनेछ । सप्ताहव्यापी महायज्ञमा भागवत पाठपारायण, पूजाआजा, भजनकीर्तन, कलशयात्रा, आरती तथा झाँकी प्रदर्शनलगायत धार्मिक कार्यक्रम सञ्चालन गरिने विद्यालयले जनाएको छ ।
प्रविधिको प्रयोग र शैक्षिक गुणस्तर अभिवृद्धि गरी स्थानीय स्तरमै गुणस्तरीय शिक्षा उपलब्ध गराउने विद्यालयको लक्ष्य छ । अध्ययनका लागि बालबालिकालाई सहरबजार पठाउनुपर्ने बाध्यता न्यूनीकरण गर्दै गाउँमै राम्रो शैक्षिक वातावरण निर्माण गर्न महायज्ञबाट प्राप्त रकम परिचालन गरिने जनाइएको छ ।
विसं २०१७ मा स्थापना भएको दीपशिखा माध्यमिक विद्यालयमा कक्षा १ देखि १२ सम्म पठनपाठन हुँदै आएको छ । विसं २०४७ देखि माध्यमिक र २०६५ देखि कक्षा ११ र १२ को पढाइ सुरु गरेको विद्यालयमा हाल १९६ विद्यार्थी अध्ययनरत छन् ।
