अभिनेता तथा चलचित्र कलाकार संघका अध्यक्ष रविन्द्र खड्काले चलचित्र विकास बोर्डको सल्लाहकार समितिको सदस्य पदबाट राजीनामा दिएका छन् ।
सामाजिक सञ्जालमा राजीनामा पत्रसहितको जानकारी सार्वजनिक गर्दै उनले राजीनामा दिएको बताएका हुन्।
सल्लाहकार समितिले दिएका सुझाव कार्यान्वयन हुन नसकेको र केही महिनायता बोर्डबाट विवादित काम हुँदै आएकाले राजीनामा दिएको उनले उल्लेख गरेका छन् । ‘पद मात्र ओगटेर चुपचाप बस्नुपर्ने बाध्यतालाई त्याग्न चाहें,’ उनले लेखेका छन्, ‘साथै म कलाकार संघको अधिवेशनमा पनि खटिनुपर्ने भएकाले राजीनामा दिएको छु ।’
कसैसँग व्यक्तिगत मनमुटाव नभएको र पदको लोभ पनि नभएको उनले जनाएका छन् । उनको राजीनामा चलचित्र विकास बोर्डले माघ २० गते स्वीकृत गरेको छ ।
