बागमती प्रदेशका मुख्यमन्त्री राजेन्द्र पाण्डेले ट्रायल सेन्टरहरुको दबाबमा परेर सवारी लाइसेन्सको लागि लागु भएको नयाँ मापदण्ड कार्यान्वयन गर्नलाई रोकेका छन् । नयाँ मापदण्ड तत्काल लागु नगर्न पाण्डेले यातायात कार्यालयका प्रमुखहरुलाई निर्देशन दिएका छन् ।
सवारी चालक अनुमति पत्र (लाइसेन्स)को लागि प्रयोगात्मक परीक्षा (ट्रायल)मा ७० अंक ल्याए पास हुने प्रणाली आइतबारदेखि लागु हुँदै थियो । उक्त प्रणालीको उद्घाटनका लागि यातायात मन्त्री घनश्याम दाहाल काठमाडौँ पुगिसकेका छन् । चाबहिल यातायात कार्यालयबाट उद्घाटन गर्ने तय भएकोमा मुख्यमन्त्री कार्यालयले हस्तक्षेप गरी नयाँ प्रणाली लागु गर्नलाई रोकेको हो ।
यातायात मन्त्रालयले सातबुँदे निर्देशनसहितको पत्र पठाएर यातायात कार्यालयलाई अंक प्रणाली मिलाउन भनेको भोलिपल्ट मुख्यमन्त्री कार्यालयले रोक्ने निर्देशन दिएको हो । ट्रायल सेन्टरले आफूखुसी सेवाग्राहीबाट आर्थिक लाभ लिइरहेकाले नयाँ प्रणाली लागू गर्न अटेर गरेको प्रदेश यातायात मन्त्रालयका अधिकारी बताउँछन् ।
मुख्यमन्त्री कार्यालयको अवरोध भने यो दोस्रो पटक हो । गत असोज २ मा अंक प्रणाली लागू गर्न भक्तपुरको राधेराधेस्थित यातायात कार्यालयमा उद्घाटनको तयारी सकिएपछि मुख्यमन्त्री कार्यालयले पत्र पठाएर रोकेको थियो ।
