भरतपुर महानगरपालिका वडा नं.९, स्थित केन्द्रीय बस टर्मिनलको उत्तरतर्फ खाली रहेको जग्गामा अहिले फुटपाथ पसलले भरिएको छ । राजनीतिक दलहरुले आमसभा गर्ने स्थलको रुपमा प्रयोग गर्दै आइरहेको उक्त जग्गामा केही महिनायता फुटपाथ पसलहरु भरिदै गएका छन् । ३ वटा कित्तामा २ विघा ९ कठ्ठा ११ धुर उक्त जग्गा राष्ट्रिय सहकारी विकास बोर्डको नाममा रहेको छ । दिनदिनै फुटपाथ पसल भरिन थालेपछि बोर्ड झस्किएको छ ।
फुटपाथ पसल हटाउन सरोकारवाला निकायलाई आग्रह गर्दा पनि सुनुवाई नभएपछि अन्ततः बोर्ड पत्रकार सम्मेलन गरि फुटपाथ हटाउन सहगोग गरिदिन आग्रह गरेको छ । बोर्डले भरतपुरमा शुक्रबार विहान पत्रकार सम्मेलन गर्दै फुटपाथले भरिएको जग्गा खाली गराईदिन आग्रह गरेको हो । बोर्डका सह–अध्यक्ष मित्रराज दवाडीले दिनदिनै फुटपाथ पसल थपिदै गएकाले तत्काल सो जग्गा खाली गराउनुपर्ने अवस्था आएको बताए । ‘पछि सबै पसलले भरिदै गयो भने हामीलाई हटाउन गाह्रो हुन्छ, अहिले नै सो जग्गा खाली राख्न आग्रह गरिरहेका छौं’–दवाडीले भने ।
बोर्डको नाममा सो ठाउँका ४ विघा ९ कठ्ठा ११ धुर जग्गा रहेको छ । जसमध्ये २ विघामा तत्कालिन भरतपुर नगरपालिका र बोर्डको संयुक्त लगानीमा बसपार्क संचालनमा ल्याईएको छ । बाँकी खाली रहेको जग्गामा विभिन्नमा समयमा राजनीतिक दलहरुले आमसभा र मेलामहोत्सव लाग्ने गरेको थियो । अहिले त्यहाँ खाली ठाउँ देख्न सकिदैन । खाली ठाउँमा बोर्डले सहकारी कृषि बजार भवन निर्माण गर्ने तयारी गरिरहेको छ । त्यसका लागि बोर्डले आवश्यक पूर्वतयारीहरु वन तथा वातावरण मन्त्रालयको इआईए प्रतिवेदन स्वीकृत, शहरी विकास तथा भवन निर्माण विभागबाट प्रस्तावित भवनको डिजाइन स्वीकृत प्रदान, भवनको डीपीआर, २ अरब ५२ करोड ७७ लाख ५३ हजार १५३ रुपैयाँको बजेट सुनिश्तिता गरिसकेको छ भने नेपाल सरकारबाट नक्सापास सम्बन्धी कार्यका लागि ७५ लाख रुपैयाँ बोर्डमा निकासा भइसकेको छ ।
केही समय बोर्ड पदाधिकारी विहीन हुनुको साथै कार्यसम्पादनमा समेत ढिलाई हुँदा उक्ता जग्गा खाली रहेको बोर्डको भनाई छ । उक्त जग्गामा कुनै पनि व्यापारिक संघसंस्थाहरुसंग लिखित रुपमा कुनै प्रकारको भाडामा दिने÷लिने करार सम्झौता नगरेको बोर्डले जनाएको छ । ‘व्यापार गराउन हामीले कसैलाई जग्गा दिएका छैनौं, जग्गा खाली गराउनका लागि चाहीँ जिल्ला प्रशासन कार्यालय, भरतपुर महानगरपालिकालाई समेत पत्र पठाएका छौं तर ठोस प्रक्रिया अघि बढेको छैन’–बोर्डका सहअध्यक्ष दवाडीले भने ।
