पार्टीभित्रको बेतिथि बारे खरो रुपमा उत्रिने काँग्रेसका युवा नेता सुबोध प्रधानले प्रदेश सभा सदस्यमा इच्छा राखेका छन् ।
बाग्मती प्रदेश सभा सदस्यका लागी चितवन क्षेत्र नम्बर २ (क) बाट समानुपातिक तर्फ प्रधानले आवेदन दिएका छन् । पार्टीलाई विकास र रचनात्मक बाटोमा अघि बढाउन आवाज उठाउन प्रदेश सदस्यका लागि तयारी गरेको प्रधानले बताए । सोही अनुरुप उनले बुधबार पार्टीको क्षेत्रीय समितिमा आवेदन दिएका हुन् ।
वि.सं. २०७० सालमा तत्कालिन कांग्रेस सभापति शुशील कोइराला चितवनबाट निर्वाचन लड्दा प्रधान अग्रमोर्चामा खटिएका थिए । सानै उमेरदेखि उनी पार्टीको गतिविधिमा सक्रिय छन् । बुबा श्यामकृष्ण प्रधानको प्रेरणाबाट राजनीतिमा लागेका उनी पार्टीका विकृति र विसंगतीकाविरुद्ध आवाज उठाउँदै आएका छन् । उनका बुबा श्यामकृष्ण र विपी कोईराला घनिष्ठ साथी हुन् । प्रधानकै घरबाट कोइरालाले राजनैतिक रणनीति तयार गर्थे ।
त्यसैबेलादेखी उनमा विपीको प्रभाव परेको थियो । सानै उमेरमा राजनीतिमा चासो राखेका प्रधान पार्टीलाई जनतामुखी बनाउने अभियानमा छन् । उनलाई पार्टीमा स्पष्ट र खरोबक्ताका रुपमा चिन्छन् । उनी काँग्रेस निकट लोकतान्त्रिक खेलकुद महासंघका अध्यक्ष समेत हुन् । त्यस्तै उनी नेपाल तरुण दलका पूर्व केन्द्रीय सदस्य पनि हुन् ।
