नेपाली कथानक चलचित्र ‘१२ सत्ताईस’ को १२ सत्ताइस बोलको शीर्ष गीत सार्वजनिक भएको छ । गीतमा दिपक आर.जे. र गिरिस खतिवडाको स्वर, प्रकाश मल्लको शब्द र दिपक आर.जे. को संगीत रहेको छ।
लाइट कमेडी जनरामा निर्माण भएको यस फिल्मको ट्रेलर समेत सार्वजनिक भैसकेको छ । फिल्ममा पैसा कमाउनको लागि १२ सत्ताइस गर्ने कथा देखाइएको छ । कथा तथा निर्देशन जोन योञ्जनको रहेको फिल्ममा समीर श्रेष्ठ, अभिषेक नेपाल, काजीराना, अस्मिता लामिछाने, सम्रान्त थापा, एभोनराज उप्रेती, भीष्म जोशी, अस्मिता खनाल, बिना कार्की, धर्मेन्द्रध्वज मल्ल, करन साउँदको मुख्य अभिनय रहेको छ।
ह्याप्पी प्ल्यानेट फिल्मस् र कमेरो फिल्म स्क्रिनको संयुक्त ब्यानरमा निर्माण भएको यस चलचित्रलाई रेणु राना, दिपक खतिवडा र रुपक थापाले निर्माण गरेका छन् । चलचित्रका सहनिर्माताको रुपमा गौतम शाहाको लगानी छ। फिल्ममा अनिश स्यांगदेनको छायांकन , कृष्ण भण्डारीको सम्पादन, विक्रम स्वारको कोरियोग्राफी रहेको छ। चलचित्र माघ ३ गतेबाट देशभर प्रदर्शनमा आउनेछ ।
