दुबई–पोखरा–दुबई सिधा उडान सुरु भएको दोस्रो दिन यात्रुको सङ्ख्या उत्साहजनक देखिएको छ । फ्लाइ दुबईले बुधबारदेखि पोखरा अन्तरराष्ट्रिय विमानस्थलमा १६५ यात्रु क्षमताको जहाजबाट नियमित उडान सुरु गरेको थियो । दोस्रो दिन पनि दुबई–पोखरा उडानमार्फत १२२ यात्रु पोखरा अतवरण गरेका थिए ।
पोखराबाट दुबईका लागि १४३ जनाले यात्रा गरेको पोखरा अन्तरराष्ट्रिय विमानस्थल नागरिक उड्डयन कार्यालयका महाप्रबन्धक जगन्नाथ निरौलाले जानकारी दिनुभयो । उहाँका अनुसार दोस्रो दिनको उडान उत्साहप्रद देखिएको छ ।
पोखरामा साँझ ६ः१९ बजे अतवरण गरेको जहाज ७ ः४४ मा पुनः दुबई फर्किएको थियो । पहिलो दिन दुबईबाट ११३ जना यात्रु ल्याएको विमानले पोखराबाट फर्किँदा १५२ यात्रु बोकेको थियो ।
“पोखरामा फ्लाइ दुबईको दुई दिनको उडानलाई हेर्दा उत्साहजनक मान्न सकिन्छ । दसैँ तिहारलगायतका चाडपर्वसमेत निजिकिएकाले दुबईबाट आउने यात्रुको सङ्ख्या थप वृद्धि हुने अपेक्षा गरेका छौँ । यहाँ आएका यात्रुलाई फर्किँदा यही विमानस्थल प्रयोग गर्न आग्रह गरेका छौँ । यसबाट अन्तरराष्ट्रिय उडान नियमित र दीर्घकालीन हुने विश्वास छ”, महाप्रवन्धक निरौलाले भन्नुभयो ।
पोखराबाट विश्वका धेरै सहरसँग सिधा हवाई सम्पर्क स्थापित गर्ने उद्देश्यले २०७९ पुस १७ गतेदेखि सञ्चालनमा आएको पोखरा अन्तरराष्ट्रिय विमानस्थल लामो समय आन्तरिक उडानमा सीमित भएको थियो । फ्लाइ दुबईले उडान भरेपछि पोखरेली उत्साहित छन । फ्लाइ दुबईले सन् २०२७ को मार्च २६ अर्थात् छ महिनाका लागि टिकट बुकिङ खुला गरिसकेको छ ।
फ्लाइ दुबईको उडानसँगै पोखरा तथा गण्डकी प्रदेशको अन्तरराष्ट्रिय हवाई सम्पर्क विस्तार, पर्यटन प्रवर्द्धन तथा यात्रु आवागमनमा थप सहज भएको पोखरा पर्यटन परिषद्का अध्यक्ष हरि भुजेलले बताउनुभयो । उहाँका अनुसार उडान दिगो र दीर्घकालीन बनाउनका लागि पोखराका विभिन्न पर्यटकीय प्याकेजमा छुट दिइएको छ । नेपाल पर्यटन बोर्डले पोखरा उडानलाई दिगो र नियमित बनाउनका लागि अन्तरराष्ट्रिय प्रवर्द्धनमा जोड दिन विभिन्न कार्यक्रम अगाडि बढाउने तयारी थालेको बोर्ड सदस्य सन्तोष पोखरेलको भनाइ छ ।
