काठमाडौं– अन्तर विद्यालय/कलेज स्तरीय भलिबल प्रतियोगिता जेष्ठ दोस्रो साता आयोजना हुने भएको छ । एञ्जल स्पोट्स एकेडेमी एण्ड रिक्रिइसन सेन्टर मनमैजुको आयोजनामा ‘प्रथम राष्ट्रिय एञ्जल्स हार्ट अन्तर विद्यालय÷कलेज स्तरीय पुरुष भलिबल प्रतियोगिता—२०७६’ आयोजना हुने भएको हो ।
काठमाडौंमा सोमबार पत्रकार सम्मेलन गरी आयोजकले प्रतियोगिता जेष्ठ १५ देखि २१ गतेसम्म आयोजना हुने जानकारी दिएको हो । पहिलो पटक आयोजना गरिएको प्रतियोगितामा देश भरका ८० देखि सय टिमको सहभागिता रहने आयोजकको दाबी छ । स्कुलमा पढिरहेका देखि कक्षा १२ को परीक्षा दिएर बसेका खेलाडीहरुले प्रतियोगितामा खेल्न पाउने प्राबधान रहेको आयोजकले जानकारी दिएको छ ।
निजी क्षेत्रबाट आयोजना हुन लागेको पुरुष भलिबल प्रतियोगिताका लागि नेपाल भलिबल संघले ६ थान भलिबल सहयोग गरेको छ । ८० सहभागी हुने प्रतियोगिता नयाँ बसपार्कस्थित ढोरपाटन क्लबको प्राङ्गढ र मनमैंजु स्थित एकेडेमिको प्राङ्गणमा खेल सञ्जालन हुनेछ ।
उपत्यका बाहिरका टिमहरुका लागि आयोजकले खाने बस्ने व्यवस्था गरेको छ । जसमा आयोजकले प्रतियोगितामा २५ देखि ३० जना टिमको सहभागिता जनाउने अनुमान गरिएको छ । जसका लागि ५ लाख खर्च छुट्याइएको छ ।
प्रतियोगिताको विजेताले १ लाख नगदसहित ट्रफी, गोल्डमेडल र प्रमाणपत्र प्राप्त गर्नेछ भने दोस्रे हुनेले ५० हजार नगदसहित ट्रफी, सिल्भर मेडल र प्रमाणपत्र प्राप्त गर्नेछन् भने तेस्रो हुने टिमले २५ हजारसहित ट्रफी, कास्य पदक प्राप्त गर्नेछ । यस्तै, चौथो हुनेले सान्त्वना पुरस्कार १५ हजार सहित ट्रफी र प्रमाणपत्र प्राप्त गर्नेछ ।
यस्तै, व्यक्तिगत विधातर्फ, बेष्ट स्पाईकर, बेष्ट लिफ्टर, बेष्ट सर्भर, बेष्ट ब्लकर, बेष्ट डिफेन्स र बेष्ट कोचले गोल्ड मेडल र प्रमाणपत्रसहित समान ५—५ हजार प्राप्त गर्नेछन् । ६ दिनसम्म चल्ने प्रतियोगिताको अनुमानित लागत खर्च १८ लाख रहेको छ ।
विद्यालयस्तरका खेलाडीमा रहेको प्रतिभाको पहिचानका लागि प्रतियोगिता आजोजना गर्न लागिएको कार्यक्रम संयोजक दिलबहादुर बुढाथोकीले बताए । उनले पहिलो पटक हुन लागेको प्रतियोगितालाई सफलतापूर्वक सम्पन्न गर्दै आगामी वर्षहरुमा पनि निरन्तरता दिने बताए ।
