जोडिनुहोस

Banner

चितवन, माघ ४-

चितवनमा मेला महोत्सव तथा भीडभाडलाई लक्षित गरी चोरी गर्ने समूह पक्राउ परेका छन् ।

पक्राउ पर्नेमा छिमेकी राष्ट्र भारतका सात जना महिला रहेको जिल्ला प्रहरी कार्यालय चितवनले विज्ञप्तिमार्फत् जानकारी दिएको हो ।

भारत गोरखपुर स्थायी ठेगाना भएकी वर्ष २५ की प्रियाङ्का देवी, वर्ष २० की अतिम्मा देवी, वर्ष २५ की पायल देवी, वर्ष १८ की नितु देवी, वर्ष ३५ की शिला देवी, वर्ष ४० की मञ्जु देवी, वर्ष १८ की आरोही भारती रहेका छन् ।

मकर सक्रान्तिको अवसरमा देवघाटमा लाग्ने मेला तथा अन्य महोत्सवमा हुने भीडभाडको फाइदा उठाई सर्वसाधारणले साथमा बोकेको नगद लगाएका गरगहना चोरी गर्ने उद्देश्यले भारतीय मुलका महिलाहरु नेपालमा सक्रिय रहेको भन्ने सूचना प्राप्त भएसँगै प्रहरी टोली खटिएको चितवन प्रहरीले जनाएको छ । नेपालमा आई चोरी गर्ने कार्यमा संलग्न उनीहरुले माघ १ गते अन्दाजी १२ः३० बजे भरतपुर १० बस्ने बसन्त गिरी र सीता गिरीको साथबाट ६ हजार रुपैयाँ र ९४ हजार मूल्य बराबरको दुई थान सुनको औठी चोरेका थिए ।

चितवन प्रहरीका अनुसार नारायणगढ स्थित शहिदचोकको फुटपाथमा ठेला पसलमा सामान किनीरहेको अवस्थामा घेरा हाली कोही झोला समात्ने, कोही बहाना बनाई कुराकानी गर्दै ध्यान अन्यत्र मोड्ने जस्ता क्रियाकलाप गरी गिरीले बोकेको झोला भित्र रहेको मनी ब्यागबाट नगद ६ हजार र ९४ हजार रुपैया मूल्य बराबरको सुनको औठी चोरेका हुन् ।

तत्काल प्रहरी टोलीले निज महिलाहरुलाई खानतलासी गर्दा सो चोरी भएको सामान फेला परेको थियो । निजहरुलाई पक्राउ गरी जिल्ला अदालतबाट म्याद अनुमती लिई थप अनुसन्धान भइ रहेको प्रहरीले जनाएको छ । सुनको औठी र नगदसँगै उनीहरुबाट प्रहरीले एटीएम कार्ड दुई थान पनि बरामद गरेको छ । साथै पक्राउ परेसँगै माघ ३ गते भरतपुर ५ कल्याणपुर बस्ने वर्ष ७४ की चन्द्र माया श्रेष्ठले समेत उनीहरु विरुद्ध मुद्दा दर्ता गराएकी छन् ।

माघ १ गते निज सात जना महिला मिली विभिन्न बहाना बनाइ दुई लाख बराबरको सुनको सिक्री चोरी गरेकोमा कारबाही गरी पाउँ भनी श्रेष्ठले उजुरी दिएकी हुन् । निजहरु बिरुद्ध अर्को किटानी जाहेरी प्राप्त हुन आएको भन्दै जाहेरी सम्बन्धमा थप अनुसन्धान कार्य भइरहेको बताइएको छ । साथै भीडभाड स्थल तथा सवारी साधनमा त्यस प्रकृतिका मानिसहरु देखिएमा सतर्क रहन र सो को जानकारी नजिकको प्रहरी कार्यालय वा १०० मा तत्काल कल गर्न समेत नागरिकमा प्रहरीले अनुरोध गरेको छ ।

तपाइको प्रतिक्रिया दिनुहोस्

Leave a Reply

Your email address will not be published.