जोडिनुहोस
  • होमपेज
  • पहुँच नपुगेका ठाउँको विकासमा मेरो प्राथमिकताः सांसद गाहा

पहुँच नपुगेका ठाउँको विकासमा मेरो प्राथमिकताः सांसद गाहा

ज्ञानु पंगेनी

नवलपुर, कात्तिक २६

कावासोती नगरपालिका–८ को भेरी गुडचोकदेखि जनकल्याण टोलसम्मको ६५८ मिटर बाटो कालोपत्रे भएको छ ।

गण्डकी प्रदेश संसद विकास कोषको ५६ लाख ५८ हजार ५७२ रुपैयाँको लागतमा पूर्वाधार विकास कार्यालय नवलपरासी पूर्व मार्फत् उक्त बाटो कालोपत्रे गरिएको हो ।

गण्डकी प्रदेशसभा सदस्य रोशनबहादुर गाहाले बुधबार उक्त बाटो उद्घाटन गर्दै आफूले जनताको मागलाई सम्बोधन गरी बाटोका लागि बजेट बिनियोजन गरेको बताए । उनले भने, ‘जहाँका जनता पहँचमा छैनन्, जुन ठाउँ पछाडि परेको छ , त्यस्ता ठाउँलाई प्राथमिकतामा राखेर विकास निर्माणका काममा बजेट बिनियोजन गर्दै आएको छु ।’ ‘पहँुच पुगेका र बजार क्षेत्रका ठाउँहरुमा सहजै विकास हुन्छ तर जहाँ पहुँच पुग्दैन त्यस्ता ठाउँको विकास गर्नुपर्छ भन्ने मेरो धारणा छ । सोही अनुसार मैले काम गरिरहेको छु ।’ गाहाले भने । गाहाले यसपटक कावासोतीका ग्रामीण क्षेत्रका बाटोलाई कालोपत्रे गर्न बजेट बिनियोजन गरेको बताए । आफ्नो निर्वाचन क्षेत्र अन्तर्गत पर्ने देवचुलीमा पनि पहाडी क्षेत्रको बाटोको काम भइरहेको उनले बताए । ‘मुन्डेदेखि कीर्तिपुर , कीर्तिपुरदेखि बन्दीपुर , बन्दीपुरदेखि कदमपुर र कदमपुरबाट चौधरी चाउचाउ फ्याक्ट्रीको पछाडिसम्म आउने पहाडको रिङरोडका रुपमा नमुना सडक बन्दैछ । आउँदो डेढ वर्षभित्र सम्पन्न हुन्छ । पहाडको बुलिङटारमा अहिलेसम्म कसैले बनाउन नसकेको बगैँचाचोक र दलित मार्ग दुई वटा सडकमा ढुंगा सोलिङ मार्फत् ढलान मार्फत् पक्की सडक बन्दैछ । यो पहाडी क्षेत्रको विकासमा नमुना काम हो । ’ पहाडी क्षेत्रमा कालोपत्रे सडक निर्माण गर्न समस्या हुने हुँदा यसरी ढुंगा सोलिङ मार्फत् ढलान गरी सडक निर्माण गरिएको गाहाले बताए । गर्न चाह्यो भने जस्तोसुकै काम पनि सम्पन्न गर्न सकिन्छ भन्ने उदाहरण बुलिङटारको सडकबाट सिकेको उनले बताए । संघीयता, प्रदेश र स्थानीय तह नभएको भए अहिले जसरी गाउँगाउँको विकास भएको छ , त्यो सम्भव नहुनेमा गाहाको जोड थियो ।

बाटो निर्माण समितिका अध्यक्ष नारायण आचार्यले आफूहरुको गुनासो सुनेर बाटोका लागि बजेट बिनियोजन गरेकोमा सांसद गाहालाई धन्यवाद व्यक्त गरे । उनले आफ्नो टोलका अन्य विकास निर्माणका काममा पनि आगामी दिनमा साथ र सहयोग गर्न आग्रह गरे । आफ्नो गाउँठाउँको विकासका लागि सकेको पहल गरिरहेको र बाटो पनि गुणस्तरीय निर्माण भएकोमा आफू विश्वस्त रहेको उनको भनाइ थियो ।

कार्यक्रममा कावासोती वडा नम्बर १० का अध्यक्ष टेकबहादुर महतो, वडा नम्बर आठका वडा सदस्य देवी पौडेल, चन्द्रगुप्त अधिकारी, नेकपा जिल्ला कमिटी सदस्य बाबुराम विश्वकर्मा , पूर्वाधार विकास कार्यालयका प्रमुख रविन्द्र तिवारीलगायतको सहभागिता रहेको थियो ।
बाटो निर्माण समितिका अध्यक्ष नारायण आचार्यको अध्यक्षतामा भएको कार्यक्रममा नारायण पौडेलले सहजीकरण गरेका थिए । शिव निर्माण सेवा विनयी त्रिवेणीले बाटो निर्माणको ठेक्का लिएको थियो ।

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

प्रचलन खबर

धेरै टिप्पणी गरिएका