जोडिनुहोस
  • होमपेज
  • सिनर्जी एफएम आजदेखि १९ औँ वर्षमा प्रवेश

सिनर्जी एफएम आजदेखि १९ औँ वर्षमा प्रवेश

चितवन, कात्तिक २६–

चितवनको पहिलो रेडियो स्टेशन सिनर्जी एफएम ९१.६ मेगाहर्ज आज (मंगलबार)देखि १९ औँ वर्षमा प्रवेश गरेको छ ।
वि.सं.२०५८ कात्तिक २६ गते आजकै दिन चितवनको पहिलो रेडियोको रुपमा भरतपुर–१० मा सिनर्जी एफएम स्थापना भएको थियो । सिनर्जीको स्थापनासँगै चितवनमा रेडियो खुल्ने क्रम बढेको थियो । हाल जिल्लामा झण्डै दुई दर्जनको हाराहारीमा रेडियो स्टेशनहरु रहेका छन् ।

सिनर्जी एफएमका स्टेशन म्यानेजर रामकान्त पौडेलले एफएमको १८ औँ वार्षिकोत्सवसँगै एफएमले कार्यक्रमहरुलाई थप परिस्कृत गर्दै लैजाने बताए । उनले १९ औँ वर्ष प्रवेशसंगै लोकप्रिय कार्यक्रम ‘जनबहस’ पुनःसंचालन गरिने जानकारी दिए ।
यस्तै नेपाली गीतसंगीतलाई मुख्य प्राथमिकता दिँदै आइरहेको एफएमले वार्षिकोत्सवसँगै नयाँ कार्यक्रम सार्वजनिक गरेको छ । एफएमले यसपटक ब्याण्डहरुबीच प्रतिस्पर्धात्मक कार्यक्रम आयोजना गरेको छ । एफएमका कार्यक्रम संयोजक एवम् पहिलो कार्यक्रम प्रस्तोता मनोज घिमिरेले चितवनका विभिन्न रेष्टुरेन्टहरुमा प्रस्तुति दिइरहने ब्याण्डहरुबीच प्रतिस्पर्धा गराइने बताए ।

सो प्रतियोगिता अन्तरगत चितवनसँगै अन्य जिल्लाका गरी २० वटा ब्याण्डबीच प्रतिस्पर्धा गराइने घिमिरेले बताए । एफएमका कार्यक्रम प्रस्तोता रविन सुवेदीले वार्षिकोत्सवसँगै एफएमका कार्यक्रमलाई थप परिस्कृति गर्दै लैजाने बताए । उनले सबैजसो रेडियोको कार्यक्रमको ढाँचा एकैखालको जस्तो हुने गरेको भन्दै सिनर्जीले फरक ढंगले कार्यक्रमहरु अघि बढाइने बताए ।

एफएमका स्टेशन म्यानेजर पौडेलले रेडियोमा नयाँनयाँ कार्यक्रम संचालनका लागि कर्मचारीहरु थप गर्दै अघि बढिरहेको बताए । उनले भने, –‘श्रोतासँगै दर्शकसँग पनि नजिक हुने प्रयत्नमा छौँ, अनलाईन टिभीमार्फत हाम्रा कार्यक्रमहरु दर्शकमाझ लैजादै छौँ ।’

सिनर्जी एफएम आकाशीय तरंगमार्फत हाल २० घण्टा र इन्टरनेट मार्फत चौबिसै घण्टा प्रशारण भइरहेको छ । समाचार र मनोरञ्जनात्मक कार्यक्रम प्रशारण गर्दै आइरहेको सिनर्जी हाल २००० वाट क्षमताबाट प्रशारणमा छ ।

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

धेरै टिप्पणी गरिएका