जोडिनुहोस
  • होमपेज
  • नवलपुरमा ‘खेताला’ पाउनै मुस्किल,खोसाखोस गर्छन किसान

नवलपुरमा ‘खेताला’ पाउनै मुस्किल,खोसाखोस गर्छन किसान

ज्ञानु पंगेनी,

नवलपुर,साउन ४-

धान रोपाई नवलपरासीका दक्षिणी क्षेत्रका बासिन्दालाई रोजगारीको माध्यम बनेको छ । नवलपरासी पश्चिममा रहेका धान रोपाई हुने गाउँ माकर, बेलानी, दोविला, जमुनिया, कुकुरमारा, गंगाबस्ती, भटौलियालगायतका दर्जनौ गाउँमा रोपाई गर्न खेताला खोसाखोस नै हुने गरेको छ ।

केहि वर्ष अघिसम्म अर्मपर्म गरेर रोपाई हुने यी गाउँमा अहिले रोपाईका लागि खेताला पाउनै गाह्रो हुन थालेको थाहा पाएपछि विगत ३÷४ वर्षदेखी यहाँ जिल्लाकै दक्षिणी क्षेत्रका बासिन्दा वर्षेनी खेताला आउने गरेका छन् । खासगरी जिल्लाको सिमा क्षेत्र त्रिवेणी, प्रतापपुर, सेमरी, गुठीप्रसौनीका बासिन्दा यी गाउँमा रोपाईका लागि आउने गर्छन् ।

सिमावर्ती क्षेत्रमा गण्डक नहरको पानीले सिंचाई हुने भएकाले यहाँका बासिन्दाले असारको दोश्रो हप्तामै आफ्नो खेत रोपाई सक्छन् । आफ्नो रोपाई सकेलगत्तै ५०÷६० जनाको टोली बनाएर खेताला अभाव हुने गाउँमा रोपाईका लागि पुग्ने गरेको सेमरीबाट खेत रोप्न आएका रोशन गुप्ताले बताए । गुप्ताका अनुसार एउटै परिवारका पाँच जनासम्म खेताला हिड्छन । आकाशे पानीको भरपर्नुपर्ने गाउँहरुमा प्रायः असारको अन्तिम साताबाट साउनको अन्तिम सातासम्म रोपाई हुन्छ ।

घरमा त्यसै बस्न भन्दा रोपाईमा हिडे आम्दानी हुने भएकाले टोली नै बनाएर रोपाईमा हिड्ने गरेको गुप्ता बताउँछन् । रोपाईमा हिड्नेमा अधिकांश पुरुष नै छन् । पुरुष भए पनि उनीहरुले महिलाहरुले झै छिटोछिटो रोपाई गर्छन् । उनीहरु ५०/६० जनाको टोली नै बनाएर गाडी नै रिजर्भ गरेर आउने जाने गर्छन् । विहान सातबजेतिर रोपाई हुने गाउको पायक पर्ने स्थानमा जम्मा हुन्छन् । उनीहरु आईनपुग्दै खेताला खोज्ने गाउँलेहरुको भिड लाग्छ । गाडीबाट झर्न नपाउदै खेताला आफ्नोमा ल्याउन तछाडमछाड नै हुने गर्छ । महिला, पुरुष किशोर, किशोरी सबै मिलाएर टोली–टोली बनेर उनीहरु बाडिएर रोपाई गर्छन् ।

माकरकी किसान चिसा रामदामका अनुसार उनीहरु विहान करीब नौ बजेबाट साँझ पाँच बजेसम्म आठ घण्टा काम गर्छन् । यस वर्षको खेत रोपाईमा उनीहरुलाई दिनको पाँच सय रुपैयाँ ज्याला दिएको रामदामले बताईन् । विहानको खाना र दिउँसो नास्ता दिएर आउनेजाने गाडीभाडा समेत उनीहरुलाई दिएको उनले बताईन् । नभए उनीहरुले काम गर्न मान्दैनन् । माकरका अधिकांश किसानले उनीहरुबाटै रोपाई गराएको रामदामले जानकारी दिईन् ।

४/५ वर्ष अघिसम्म गाउँका दिदी बहिनीहरु मिलेर पर्म लगाएर पालैपालो एक अर्काकोमा रोपाई गर्ने प्रचलन रहेको थियो । तर अहिले यहाँ यो प्रचलन हराईसकेको मञ्जु केसी बताउँछिन् । युवा पुस्ताले खेतीप्रति चासो नदिने, गाउँका अधिकांश पुरुष सबै विदेश गएर कमाएका कारण पनि गाउँमा अर्मपर्म गरेर खेती लगाउने प्रचलन हराउँदै गएको उनको बुझाई छ । ‘पहिले आम्दानी राम्रो नहुँदा खेतालालाई दिने पैसा हुन्थेन, अर्मपर्म गरेर महिनौसम्म रोपाईमा हिडिन्थ्यो’ केसीले भनिन् ‘अहिले सबैले विदेश गएर कमाएका छन्, किन दुःख गर्ने भनेर अर्मपर्ममा हिड्न छाडेका हुन् ।’

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

प्रचलन खबर

धेरै टिप्पणी गरिएका