तत्कालीन काठमाडौं नगर पञ्चायतका उपप्रधानपञ्च तीर्थराम डंगोलको निधनमा काठमाडौं महानगरपालिकाले आइतबार शोक बिदा दिने भएको छ । महानगरको प्रशासन विभागले शनिबार सूचना जारी गर्दै शोक बिदासम्बन्धी जानकारी दिएको हो ।
डंगोलको शुक्रबार निधन भएको थियो । वि.सं. २००४ साल माघ २९ गते जन्मेका डंगोल लामो समयदेखि पिसाब थैलीको क्यान्सरसँग जुधिरहेका थिए । उनको उपचारमा संलग्न स्वास्थ्यकर्मीका अनुसार मिर्गौलामा एकैपटक समस्या बढेर डाइलाइसिस गराउनु परेको थियो । हप्तामा २ दिन गराउनुपर्ने डाइलाइसिस गएको बिहीबार मात्र पनि गरिएको थियो ।
