च्याट जिपिटी निर्माता कम्पनी ओपन एआइको एक्स प्लाटफर्ममा आधिकारिक अकाउन्ट OpenAI Newsroom ह्याक भएको छ । उक्त अकाउन्ट ह्याक गरेर ह्याकरले क्रिप्टोकरेन्सी काण्डलाई प्रबर्धन गर्ने कोसिस गरेका छन् ।
ह्याकरले ओपन एआईको एक्स अकाउन्टमा एउटा पोस्ट गर्दै कम्पनीले $OPENAI नामको एउटा नयाँ क्रिप्टो टोकनको सुरुआत गरेको र ओपन एआई प्रयोगकर्ताले त्यसको फाइदा उठाउन सक्ने झुटो खबर प्रवाह गरे । ओपन एआइको न्युजरुम अकाउन्टको एक्स प्लाटफर्ममा धेरै फलोअर्स छन् । सोही अकाउन्टलाई ह्याक गरेर ह्याकरले एउटा वेबसाइटको लिंक शेयर गरिदिए । ह्याकरको उद्देश्य क्रिप्टोकरेन्सी स्क्याम मार्फत् ठगी गर्नु र आम मानिसबाट ठूलो रकम कुम्ल्याउनु थियो ।
ह्याकरले पोस्ट गरेको ट्वीटमा रहेको लिंकमा क्लिक गर्दा ओपन एआइको वेबसाइट जस्तै देखिने एउटा वेबसाइट खुल्दथ्यो । त्यसको युआरएल ओपन एआईसँग मिल्दोजुल्दो थियो ।
ह्याकरहरुको प्रयासका बाबजुत उक्त स्क्यामको सिकार कोही पनि भएनन् । साथै कम्पनीले त्यस विषयमा केही पनि बताएन ।
ओपन एआईले आफ्नो आधिकारिक न्युजरुम एक्स अकाउन्टमा ह्याकरले राखेको उक्त पोस्ट हटाइसकेको छ । साथै उक्त ह्याकिंगका विषयमा आधिकारिक रुपमा कम्पनीले केही पनि बताएको छैन ।
ओपन एआई न्युजरुम अकाउन्टको सुरुवात केही दिन अघि मात्रै भएको थियो । एक महिनाभन्दा कम अवधिमा त्यसका फलोअर्स हजारौं पुगिसकेका छन् । एजेन्सी
