रुकुम पश्चिममा खोलाले बगाउँदा २ जनाको मृत्यु भएको छ । मुसिकोट नगरपालिका ६ र ७ को सिमानामा पर्ने रम्मा खोलाको बाढीले बगाउँदा दुई जनाको मृत्यु भएको हो ।
जिल्ला प्रहरी कार्यालयका सूचना अधिकारी एवं प्रहरी निरीक्षक बखत बहादुर शाहीका अनुसार खोलाले बगाउँदा मुसिकोट नगरपालिका ६ की अन्दाजी ३० वर्षीया निर्मला केसी थापा र ४ का अन्दाजी ५० वर्षीय सर्जन पुनको मृत्यु भएको छ । उनीहरुको शव आज (सोमबार) बिहान प्रहरीले फेला परेको थियो । सर्जनको शव खोला तर्ने स्थानबाट करिब २० मिटर तल मोटरसाइकलले च्यापेको अवस्थामा र निर्मलाको शव करिब तीन सय मिटर तल शरीरको आधा भाग माटोले पुरिएको अवस्थामा फेला परेको थियो ।
आइतबार बेलुकी साँखबाट कानेबाङतर्फ जाँदै गर्दा रा ६ प २९६१ नम्बरको मोटरसाइकललाई खोलाले बगाएको थियो । प्रहरीका अनुसार मोटरसाइकल निर्मलाले चलाएकी थिइन् ।
