क्रिकेट

बागमती प्रदेश महिला क्रिकेट छनोट प्रतियोगिता चितवनमा हुँदै, गौतमबुद्ध क्रिकेट रंगशालामा तयारी सुरु

Banner

चितवन, मंसिर ११–

प्रधानमन्त्री कप महिला क्रिकेट प्रतियोगिताका लागि बागमती प्रदेश टिम छनोट प्रतियोगिता चितवनमा हुने भएको छ । बागमती प्रदेश क्रिकेट संघले गौतमबुद्ध अन्तर्राष्ट्रिय क्रिकेट रंगशाला भरतपुरको नमुना क्रिकेट मैदानमा प्रतियोगिता आयोजना गर्न लागेको हो ।

प्रतियोगिताको स्थानीय आयोजक चितवन जिल्ला क्रिकेट संघले प्रतियोगिताको तयारी सुरु गरेको छ । रंगशालाको नमुना मैदानमा आजदेखि घाँस काट्ने मैदान मिलाउने काम सुरु भएको चितवन क्रिकेट संघका अध्यक्ष सुदिप पियाले जानकारी दिए । ‘नमुना मैदानमा घाँस बढेर खेल्नलायक थिएन, आजबाट घाँस काट्ने काम सुरु गरेका छौं, दुई तीन दिनमा सबै मैदानको तयारी सकेर खेल्न योग्य बनाउँछौं’–मैदानमा खटिएका अध्यक्ष पियाले भने ।

नमुना मैदानको संरक्षण हुन नसक्दा क्रिकेट खेल्नको लागि मैदान अभाव हुँदै आइरहेको छ । मुख्य रंगशाला निर्माण पुरा नहुँदासम्म यस नमुना मैदानलाई अब संरक्षण गरेर वर्षभरी खेल्न योग्य बनाइने अध्यक्ष पियाले बताए । ‘भरतपुर महानगरपालिकासंग हामी निरन्तर सहकार्यमा छौं, नमुना मैदानमा वर्षेनी खेल संचालनका लागि क्रिकेट संघलाई संरक्षणको जिम्मेवारी दिए हामी सधै खेल्न योग्य बनाउने थियौं’–पियाले भने ।

छनोट प्रतियोगिता यही मंसिर १५ गते शुक्रबारदेखि सुरु हुँदैछ । प्रतियोगितामा बागमतीका काठमाडौँ, भक्तपुर, ललितपुर र चितवनका टिम सहभागिता जनाउँदैछ । हरेक दिन दुई खेल हुनेछ । प्रतियोगिताको पहिलो खेलमा विहान ९ बजे काठमाडौँ र भक्तपुर भिड्ने छ भने दिउँसो १२ः३० बजे हुने दोस्रो खेलमा चितवन र ललितपुरबीच प्रतिस्पर्धा हुने आयोजकले जनाएको छ ।

छनोट प्रतियोगिता ३ दिनसम्म चल्ने छ । त्यसलगत्तै मंसिर २० गतेदेखि यस मैदानमा बागमती ओमेन्स इलिट ट्रफी प्रतियोगिता समेत हुनेछ । यस प्रतियोगितामा बागमती हरियो, निलो र रातो टिमबीच प्रतिस्पर्धा हुनेछ । यस प्रतियोगिताको चार खेल मात्रै नमुना मैदानमा हुनेछ । यस प्रतियोगिताको फाइनलसहित तीन खेल भने काठमाडौंँस्थित मुलपानी क्रिकेट मैदानमा हुनेछ ।

प्रधानमन्त्री कप महिला क्रिकेट प्रतियोगिता पुस १ गतेदेखि काठमाडौँमा हुदैछ । त्यसअघि बागमती प्रदेशको टिमले शसस्त्र प्रहरी बलको एपिएफ क्लवसंग तीन खेलको सिरिज खेल्ने बागमती प्रदेश क्रिकेट संघले जनाएको छ ।

तपाइको प्रतिक्रिया दिनुहोस्

Leave a Reply

Your email address will not be published. Required fields are marked *

>