दोस्रो संस्करणको ‘एक्सपर्ट पब्लिक स्पिकिङ च्याम्प–२’ को नारायणगढ अडिसन आइतबार सम्पन्न भएको छ ।
विमोचन इभेन्ट एण्ड इन्टरटेनमेन्ट प्रालिको आयोजना र एक्सपर्ट एजुकेसन एण्ड भिसा सर्भिसेस नारायणगढको मुख्य प्रायोजनामा सुरु भएको दोस्रो चरणको प्रतियोगिताको अडिसन नारायणगढको नारायणी कला मन्दिरमा दुई दिनसम्म चलेको थियो ।
दुई दिने अडिसनमा तीन सय जना विद्यार्थीहरुले सहभागिता जनाएको आयोजकका प्रवन्धक विमोचन आचार्यले जानकारी दिए । उनले माडीमा हुने प्रतियोगिताको अन्तिम अडिसन पश्चात छनौटमा परेका विद्यार्थीहरुको नामावली सार्वजनिक गरिने जानकारी दिए ।
अडिसनमा सञ्चारकर्मीद्धय मनोज घिमिरे र प्रवेश अधिकारीले निर्णायकको भूमिका निर्वाह गरेका थिए । प्रतियोगिताको भदौ ३१ गते माडी क्याम्पसमा अडिसन हुने प्रवन्धक आचार्यले जानकारी दिए ।
छनोट भएका प्रतियोगीहरुलाई असोज २७, २८, २९ र ३० गते तालिम दिइने बताइएको छ । दोस्रो चरणको प्रतियोगिता कात्तिक १ गते र फाइनल मंसिर १३ गते हुने बताइएको छ । प्रतियोगितामा पहिलो, दोस्रो र तेस्रो हुनेलाई क्रमश ५० हजार, ३० हजार, २० हजार मेडल ट्रफी र प्रमाणपत्र वितरण गरिने बताइएको छ ।
प्रतियोगिताको यसअघि ग्रीनफिल्ड इङ्लिस स्कुल दारेचोक मुग्लिन, पूर्वी चितवनको पर्सा्स्थित रेडक्रस भवन, कावासोतीको सिद्धार्थ इङ्लिस स्कुल, न्यू क्यापिटल कलेज टाँडी रत्ननगर, भरतपुरको दिव्यनगर र गैंडाकोटको जनक उच्च माविमा अडिसन भएको थियो ।
यस प्रतियोगितालाई सेन्ट्रल कलेज अफ भोकेसनल ट्रेनिङ सेन्टरले प्रायोजन गरेको छ । स्पिकिङ च्याम्पमा कक्षा ७ देखि १२ सम्मका विद्यार्थीहरुले भाग लिन सक्ने छन् ।
यस प्रतियोगिताको आधिकारिक अनलाईन पार्टनमा नारायणी अनलाईन डटकम रहेको छ । प्रतियोगिताको पहिलो संस्करणमा अरोमा कलेजका चिन्तामणि सुवेदी प्रथम, वाल्मीकि शिक्षा सदनकी साधना पौडेल द्धितीय र न्यू क्यापिटल कलेजकी ज्योति शर्मा तृतीय भएका थिए ।
