चितवन, साउन १२–

चितवनको पर्यटकीय गन्तव्य सौराहामा आएका आन्तरिक पर्यटकले रक्तदान गरेका छन् । कार्यक्रमको सिलसिलामा सौराहा आएका स्वदेशी लघुवित्त वित्तिय संस्था इटहरीका ४० जना कर्मचारीले रक्तदान गरेका हुन् ।

सौराहा बचत तथा ऋण सहकारी संस्थाले २० औ वार्षिकोत्सवको अवसरमा शनिबार होटलमै रक्तदान गर्ने व्यवस्था गरेको थियो । होटल मोनालिसामा बास बसेका पर्यटकहरु रक्तदान कार्यक्रममा सरिक भएका थिए । सो अवसरमा मोनालिसा होटलका १२ जना कर्मचारीसहित ५२ जनाले रक्तदान गरेको मोनालिसाका होटलका संचालक केशव खनालले जानकारी दिए ।

सौराहा बचतले दुई स्थानमा रक्तदान कार्यक्रम गरेको थियो । दुबैतर्फ गरी १०८ जनाले रक्तदान गरेको सौराहा बचत तथा ऋण सहकारी सस्थाका अध्यक्ष गणेश खतिवडाले जानकारी दिए ।