पश्चिम नवलपरासीबाट हज यात्रामा जान लागेको १६ जना मुस्लिम श्रद्धालुहरुलाई पाल्हीनन्दन गाउँपालिका अध्यक्ष दीपक गुप्ताले विदाई तथा सम्मान गरेका छन् ।
गाउँपालिकाको सहयोगमा जामिया ईमाम अहमद रजा पाल्हीनन्दन–५ आयोजना गरेको उक्त कार्यक्रममा अध्यक्ष गुप्ताले हाजीहरुलाई विदाई गर्दै गाउँपालिकासहित मुलुकको समृद्धिका लागि कामना गर्न आग्रह समेत गरे ।
पाल्हीनन्दन गाउँपालिकाले सबैधर्म जात र वर्गको समृद्धि हुने गरि काम गरि रहेको उल्लेख गर्दै उनले मदरसा शिक्षालाई व्यवस्थित गर्दै जाने बताए । मुस्लिम समुदायको बाहुल्याता रहेको उक्त गाउँपालिकाबाट नै यस वर्ष अधिकांश तीर्थयात्री रहेका छन् ।
अध्यक्ष गुप्ताले जिल्लामै नमूना काम गर्दै आएको भन्दै चौतर्फी प्रशंसा हुने गरेको छ । मुस्लिम हज यात्रीलाई पनि गाउँपालिकाको तर्फबाट विदाई तथा सम्मान गरेकोमा मुस्लिम धर्मगुरुहरुले उनको उच्च प्रशंसा गरेका थिए । कार्यक्रममा नेपाल कम्युनिष्ट पार्टी(नेकपा)का जिल्ला अध्यक्ष भविश्वर तिवारी, प्रदेश सदस्य घनश्याम यादव, जिल्ला सदस्य बुद्धन अलिलगायतले पनि शुभकामना व्यक्त गरेका थिए ।
